Turkiyya za ta raba kwarewa a fannin yawon bude ido da Iran

Ministan al'adu da yawon bude ido na Turkiyya Ertugrul Gunay ya ce kasar za ta raba gogewarta a fannin yawon bude ido da Iran.

Gunay wanda ya isa birnin Tehran a jiya asabar domin gudanar da ziyarar aiki ta kwanaki hudu ya bayyana cewa, Iran da Turkiyya suna da ababen tarihi na addini da tarihi da kuma al'adu iri daya da ke baiwa kasashen biyu damammaki da dama don kara karfafa alakarsu a fannoni daban daban da suka hada da yawon bude ido.

Ya bayyana hakan ne a yau Asabar a birnin Tehran, bayan ganawarsa da shugaban hukumar kula da al'adun gargajiya, sana'ar hannu da yawon bude ido ta Iran Hamid Baqaei.

Gunay ya ce "A shekara ta 2008, Iran da Turkiyya sun rattaba hannu kan wata yarjejeniya a fannin yawon bude ido, kuma a yayin wannan ziyarar za mu yi nazari kan shirye-shiryen da za a inganta wajen aiwatar da yarjejeniyar."

Ya kara da cewa Turkiyya ce ta bakwai a jerin kasashe goma da suka fi yawan masu yawon bude ido a duniya.

A bara, 'yan yawon bude ido miliyan 27 ne suka ziyarci Turkiyya inda a cikinsu akwai Iraniyawa kusan miliyan daya.