Mutane 18 ne suka mutu a wani hatsarin jirgin saman fasinja a Sudan ta Kudu a yau.
Jirgin mai dauke da fasinjoji 21 da ma'aikatansa, ya sauka ne jim kadan bayan tashinsa daga filin hakar mai na Unity a Sudan ta Kudu, lamarin da ya yi sanadin mutuwar mutane 18 tare da barin wasu mutane uku cikin "mummunan yanayi."
Rahotanni daga kasar na cewa, matukin jirgin da mataimakinsa na cikin wadanda suka mutu a hatsarin.
Gatwech Bipal Both, ministan yada labarai na jihar Unity, ya ce jirgin na gudanar da wani aiki na yau da kullun a yankin. Kamfanin Greater Pioneer Operating Company (GPOC) ne ya yi hayar jirgin kuma an gudanar da shi Kamfanin Jiragen Sama na Light Air Services.
“Jirgin ya sauka a nisan mita 500 daga filin jirgin, tare da mutane 21 a cikinsa. A halin yanzu, mutum daya ne kawai ya tsira.” Ministan ya kara da cewa.
A cewar ministan, jirgin na kan hanyarsa ta zuwa Juba babban birnin kasar.
A cikin 'yan shekarun nan, Sudan ta Kudu ta fuskanci bala'o'in jiragen sama da dama. Wani hatsari a watan Satumban 2018 ya yi sanadiyar mutuwar mutane akalla 19 a cikin wani karamin jirgin da ya taso daga Juba babban birnin kasar zuwa Yirol.
A shekarar 2015 wani jirgin dakon kaya da Rasha ta kera dauke da fasinjoji ya yi hatsari jim kadan bayan tashinsa a birnin Juba, lamarin da ya yi sanadin asarar rayuka da dama.
A cewar jami’an yankin, ana gudanar da bincike kan bala’in na yau, kuma kawo yanzu ba a bayyana takamaiman musabbabin hadarin ba.
