Gwamnatin Jamhuriyar Congo ta ayyana wani yanayi na bala'i bayan da akalla mutane 50,000 a yankuna uku suka rasa matsugunansu sakamakon mummunar ambaliyar ruwa.
Majalisar Ministocin ta ce ruwan sama kamar da bakin kwarya da aka shafe makonni ana yi a yankunan Likouala, La Cuvette da Plateaux ya lalata gidaje da ababen more rayuwa.
Gwamnati ta ce mummunar ambaliyar ruwa ta haifar da asarar gonaki, da dabbobi da kuma wuraren ajiyar abinci, wanda kuma ya haifar da sake bullowar cututtukan da suka shafi ruwa. Kimanin mutane 50,000 da ke gabar kogin Kongo na cikin halin kunci a cewar majalisar.
Victor Ngassi, babban sakatare na Makotipoko, fiye da kilomita 400 (mil 248) daga birnin Brazzaville, ya ce mutanen gundumarsa na fama da yunwa kuma suna jiran taimakon gwamnati.